Tuman (shahar) maktabgacha va maktab ta’limi bo‘limi xodimi maktabdagi ustama hujjatlarini tekshirishga haqlimi?
Savol: Bizning tuman MMTB xodimi maktablardagi ustama hujjatlarini tekshirishni boshladi. Ayrim maktab direktorlaridan ishchi guruh qabul qilgan qarorlarni bekor qilishini talab qilmoqda. Uning aytishicha, o‘qituvchilarga ustamalar noto‘g‘ri tayinlangan ekan. MMTB xodimining bunga vakolati bormi?
Savolga Xalq ta’limi info kanalida quyidagicha javob berildi:
Birinchidan, rahbar va pedagog xodimlar o‘z haq-huquqlarini anglab yetgan holda, o‘zini tekshiruvchiman deb tanishtiradigan har qanday shaxsga «labbay» deb javob beravermasligi kerak.
Ikkinchidan, tekshiruvchi o‘zi kim, qanday lavozimda ishlaydi, uning bu lavozimi ustama hujjatlarini tekshirishga vakolat beradimi, tekshiruv o‘tkazish bo‘yicha uning qo‘lida buyruq mavjudmi? Mana shu savollarga javob topish kerak.
Uchinchidan, o‘zini tekshiruvchiman deb tanishtirayotgan shaxsning harakatlari Vazirlar Mahkamasining 2019 yil 25 apreldagi 352-sonli qarori bilan tasdiqlangan nizom talablariga javob beradimi? Agar bunday bo‘lmasa «tekshiruvchiga» eshikni ko‘rsatib qo‘yish kerak.
❕Agar rahbar va pedagog xodimlar bu masala bo‘yicha yetarli bilimlarga ega bo‘lmasa unda vaziyatni quyidagicha tushuntiramiz:
Pedagog, psixolog va kutubxona xodimlariga ustama belgilash, umumta’lim muassasalari xodimlarini mukofotlash va ularga moddiy yordam berish umumta’lim muassasalarida tashkil etiladigan ishchi guruhlar tomonidan amalga oshiriladi.
Bunda hududiy boshqarma va tuman (shahar) bo‘limlari ishchi guruhining faoliyatiga hamda ular qabul qiladigan qarorlarga aralashishga yo‘l qo‘yilmaydi. Ya’ni, ular ustama hujjatlarini o‘rganishga haqli emas. O‘qituvchilarga tayinlangan ustamalarni bekor qilish bo‘yicha ko‘rsatma berishga esa umuman vakolati yo‘q.
Asos: Vazirlar Mahkamasining 2019 yil 30 sentyabrdagi 823-sonli qarori bilan tasdiqlangan «Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida»gi nizomning 9-bandi.
Shuni ham unutmaslik kerakki, Prezidentning 2023 yil 26 maydagi PF-79-sonli farmoni bilan tuman (shahar) maktabgacha va maktab ta’limi bo‘limlarining umumiy o‘rta ta’lim muassasalari faoliyatini tekshirish va ta’lim sifatini baholash bo‘yicha vakolatlari bekor qilingan.
Yuqoridagilardan kelib chiqib shuni aytishimiz mumkinki, tuman (shahar) maktabgacha va maktab ta’limi bo‘limi xodimi maktablarning ustama hujjatlarini tekshirishga haqli emas.
Mavzuga doir:
Maktabga kelgan tekshiruvchidan hujjat talab qilish mumkinmi?
To‘garaklarni tekshirish uchun komissiya kelsa nima qilish kerak?
Maktabda kimga ustama, kimga mukofot, kimga moddiy yordam berilyapti?