Choʻlpon Ergash haqida ma’lumot

Choʻlpon Ergash haqida ma'lumot
Telegramda o'qish

Choʻlpon Ergash hayoti, ijodi, asarlari, faoliyati, tarjimai hol, batafsil ma’lumotlar

Choʻlpon Ergash 1937 yilda qoʻshni Qirgʻiziston Respublikasining Oʻsh shahrida tugʻildi. Bolaligi ikkinchi jahon urushi davriga toʻgʻri kelib, ancha mashaqqatli kechdi. Toʻqqiz yoshida maktabga bordi. Harbiy xizmatdan soʻng 60-yillarda Toshkentga kelib, avval madaniy-oqartuv texnikumida, soʻngra Toshkent teatr va rassomlik institutida tahsil oldi. Biroq, sahnani emas, adabiyotni tanladi. Birinchi sheʼri “Oʻzbekiston” jurnalida chop etildi. 1970 yilda “Tong yulduzi” nomli birinchi toʻplami bosilib chiqdi.
Shundan soʻng Choʻlpon Ergashning “Bizning uyimiz”, “Muborak kunlar” (1972), “Umid chirogʻi” (1979), “Bahor orzulari” (1980), “Tongotar sadolari” (1982), “Sehrli qoʻngʻiroq”, “Oy chodir tikmoqda” (1985), “Eng baland qasr” (1986), “Karvon kelar”, “Orzuning ogʻir kipriklari” (1990) kabi kitoblari nashr etildi.
Shoir sheʼrlarini kuzatar ekanmiz, unda havoyilikdan xoli, ogʻir, vazmin va “gap tagida gap yotar” qabilidagi tuygʻular tizmasiga duch kelamiz.
Choʻlpon Ergashning, ayniqsa, “Orzuning ogʻir kipriklari” toʻplamiga kirgan “Oʻtmish oʻyini” kabi dostonlari insoniyatning asriy orzu-istaklari, armonlari boʻlmish erk, ozodlik, mustaqillik, oʻzligini topish, ona Vatan muqaddasligi, muhabbatning pokligi, baxtning butunligi, yurtning tinchligi haqida bahs yuritadi.
Choʻlpon Ergashning liro-epik janrdagi izlanishlari, xususan, yigirma dostondan iborat “Rahmon vas-vas” turkumi adabiy-madaniy hayotimizda katta voqea boʻldi. Oʻtgan asrning 70-yillar oʻrtalaridan boshlanib, 90-yil boshlarida yakunlangan dostonlar (“Shaytonning boshidan kechirganlari”, “Tangri vasiyati”, “Qiyomat”, “Ajinalar oʻyini”, “Osmondan tushgan odam”, “Rahmonning qaytishi”, “Raʼnoning savdosi”, “Jinnixonadagi tushlar”, “Bezovta ruhlar” va hokazo) majozlar, timsollar asosiga qurilgan. Yana “Sehrli qoʻgʻirchoq”, “Zar kokilli bogʻijahon afsonasi”, “Nomus va muhabbat”, “Hasharchilar”, “Umrdan lavhalar” singari liro-epik asarlari ham dostonchiligimiz tarixida oʻziga xos oʻringa ega.

Foydalanilgan adabiyot

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.

Понравилась статья? Поделиться с друзьями:
Baxtiyor.uz
Добавить комментарий

;-) :| :x :twisted: :smile: :shock: :sad: :roll: :razz: :oops: :o :mrgreen: :lol: :idea: :grin: :evil: :cry: :cool: :arrow: :???: :?: :!: