Shavkat Mirziyoyev Xalq ta’limi bo‘yicha yig‘ilishda aytgan so‘zlari

⚡️Bugun Prezident Shavkat Mirziyoyev ishtirokida xalq ta’limi tizimiga doir katta yig‘ilish bo‘lib o‘tdi. Prezident Xalqaro kongress markazida ta’lim sifatini oshirish va yangi avlod darsliklarini joriy etishga bag‘ishlangan ko‘rgazma-taqdimot bilan tanishib, sohadagi islohotlar haqida murojaat qildi.

«1 yanvardan boshlab 14 ta hududda tajriba asosida yangi darsliklar o‘qitiladi» — Shavkat Mirziyoyev

Ayni vaqtda prezident Shavkat Mirziyoyev Xalqaro kongress markazida ta’lim sohasidagi islohotlar haqida murojaat qilmoqda. Davlatimiz rahbari so‘nggi yillarda maktablarda amalga oshirilgan ishlar haqida gapirdi.

«So‘nggi 5 yilda mingta maktab qurdik. 7 millionta kompyuter sinflarini tashkil qildik. Bu kabi ishlarga 14 trillion mablag‘ berdik. Bu hozirgi sharoitimiz uchun katta mablag‘. Lekin ta’lim uchun bersak arziydi. Bu bizning kelajagimiz»

, — dedi davlat rahbari.

Shavkat Mirziyoyev 1 yanvardan boshlab 14 ta hududda yangi darsliklarni tajriba asosida o‘qitilishini aytdi.

«Keyingi bosqichda 5–11-sinflar uchun ham darsliklar ishlab chiqamiz. Murojaatnomada aytilganidek, har bir maktab bitiruvchisi ikkita tilni bilishi va bitta kasb o‘rganishi kerak. Hozir 22 ta fan bor maktablarda. Endi esa yoshlarga kreativ sohalarda dars berishimiz kerak. Fanlarni ham, dars soatlarini ham ko‘rib chiqishimiz kerak»

, — dedi Prezident.

«Balki ayrim fanlarni qisqartirarmiz, zamonaviy fanlarni ko‘paytirarmiz. Negadir biz qisqartirishdan qo‘rqamiz.

Agar biror fan zamonaviylikdan ortda qolsa, uni saqlab turishda nima ma’no bor? 10 mingdan ortiq maktabdan 842 tasining birorta bitiruvchisi oliy o‘quv yurtiga kira olmagan. Buni qanday baholash mumkin?

Biz «Bolalar yomon bo‘lib ketdi« degan fikrdan voz kechishimiz kerak. O‘zimizga savol qo‘yaylik – ularni yaxshi qilish uchun nimalar qildik?! Baribir ular o‘zimizning farzandlarimiz.

Sizlar bilan bir tanu bir jon bo‘lib, jonajon O‘zbekistonimizning kelajagi haqida o‘ylashimiz shart»

, — Shavkat Mirziyoyev.

Ta’limda o‘qituvchining kayfiyati o‘zgargani – adolatli haqiqat, – Shavkat Mirziyoyev

Prezident Yangi O‘zbekistondagi tashabbuslarni, ayniqsa, ta’lim bo‘yicha islohotlarni chekka hududlarga ham kirib borishga harakat qilinayotgani haqida gapirdi.

–Biz avvalo ustozning, muallimning obro‘sini ko‘tarishimiz kerak. Aytish kerakki, biz 20 yilda o‘qituvchilarga e’tibor qaratmadik. Bundan kim yutqazdi? Albatta, biz.

Navoiyga borganimda yoshlar bilan uchrashuv o‘tkazdim. Ulardan «sizlarni nima qiynayapti?», deb so‘radim. Ular javob bera olmadi. Savolga o‘zim javob berdim: «korxonalardagi yangi texnika, asbob-anjomlarni ishlatishda qiyinchiliklar bo‘lyaptimi?», degan edim, bir yigit bunga javoban «bilim yetishmayapti», dedi. Bu ham haqiqat

, – dedi prezident.

Davlat rahbari har bir inson o‘zining ertanggi kuni bo‘lgan farzandlarni muallimga ishonib topshirishi haqida ham gapirdi.

–Oxirgi yillarda ta’limda o‘qituvchining kayfiyati, dars berishi o‘zgargani ham adolatli haqiqat. Men o‘zim ham ta’lim berganman, bilaman bu sohani. Oliy Majlisga yo‘llangan murojaatnomada aytilgan oltita yo‘nalishni bajarish azob. Lekin bugun qiynalmasak, ertaga natija bo‘lmaydi

, – deya qo‘shimcha qildi Shavkat Mirziyoyev.

«Ota-onalarning munosabatini o‘zgartirmagunimizcha, ularning farzandlar uchun mas’uliyatini oshirmagunimizcha, hech narsaga erisha olmaymiz»…

«Ta’limga jiddiy e’tibor berishimiz, har kuni o‘z ustimizda ishlashimiz shart. Mana bir misol – repetitor bir yilda bolalarimizga til o‘rgatadi. Maktab esa 10 yilda ham o‘rgata olmasa, bu holat bizni o‘ylantirishi kerak»

, — Shavkat Mirziyoyev.

​​«Maoshlaringizni oshirdik, lekin bu bilan to‘xtab qolmaymiz. Imkoniyatimiz bo‘lishi bilan yana ko‘paytiramiz» — Shavkat Mirziyoyev

Prezident Xalqaro kongress markazida ta’lim sifatini oshirishga bag‘ishlangan uchrashuvda o‘qituvchilarning oylik maoshlari masalasiga ham to‘xtalib, hozirgacha o‘qituvchilar maoshi oshirilganligi, imkoniyat bo‘lishi bilan yana ko‘paytirilishi haqida gapirdi.

Ma’lumot uchun, 2018 yildan to hozirgacha o‘qituvchilarning maoshi 2 bosqichda oshirilgan. Avval o‘qituvchining o‘rtacha ish haqi 1,4 million so‘m atrofida bo‘lgan bo‘lsa, hozirgi kunga kelib, 1,5 baravarga oshirilib, o‘rtacha 2,6 million so‘mga yetkazilgan.

Davlat statistika qo‘mitasining ma’lumotlariga ko‘ra, hozirda eng past oylikni ta’lim sohasi xodimlari olmoqda.

​​“Ota-onalarning o‘qituvchiga munosabati o‘zgarishi kerak” – Shavkat Mirziyoyev

“Biz ota-onalar bilan yetarlicha ishlay olmayapmiz. Toki ularning maktabga, ustozga munosabati o‘zgarsin. Men Janubiy Koreya islohotlarini ko‘p o‘rganaman. Ular 50-60 yil oldin juda qiyin vaziyatdagi kambag‘al davlat bo‘lgan.

Oltini yo‘q, misi yo‘q, nefti yo‘q kichkinagina davlat bugun iqtisodi bo‘yicha o‘ntalikka kirgan. Zamonaviy texnologiyalar bo‘yicha esa mutlaq yetakchi. Ular ham qiyin davrlarni o‘tkazishgan. Qaysiki o‘quvchi maktabga bormasa, eshigini taqillatib “Sen jamiyatga qarshi ish qilyapsan” deya tushuntirishgan. Biz afsuski ana shunday ishlay olmayapmiz.

Biz ham mahalla bilan hamkorlikda ana shunday ishlashimiz zarur. Farzand ta’limi ota-onaga kerak bo‘lmasa, biz qanday yordam berishimiz mumkin? Ota-onaga daromad kerakdir, lekin farzand ta’limi, tarbiyasi birinchi navbatda bo‘lishi shart”

– dedi prezident tadbir ishtirokchilariga qarata.

❗️​​Prezident tuman va viloyat xalq ta’limi bo‘limlarini tanqid qildi

«Biz hammani matematik qilishni istaymiz, ammo buning iloji yo‘q. Nari borsa 10 foiz bola matematik bo‘lishni istar. Biz bolaning istagidan kelib chiqib, uning talabiga ko‘ra ta’lim berishni o‘rganishimiz kerak. Bola o‘ziga nima qiziq ekanini yaxshi biladi, unga hamma fanni birdek o‘rgatishni to‘xtatib, qiziqish sohasiga urg‘u qaratish lozim.

«Rayono» va «oblono» siz uchun prokuror. Bu ikki tashkilotni yo‘q qilishni istayapman, maktablarning o‘zi «rayono» va «oblono» bo‘lishlaring kerak. O‘rtadagi boshqa pog‘onalar nimaga kerak? Ular bo‘lgani uchun o‘qituvchi qadam qo‘ya olmaydi. Buni sindiradigan vaqt keldi.

Tartib kerak albatta, ammo buning uchun vazirlik bor. Bizda hamon eski tizim saqlanib qolmoqda. Maktab aslida «gorono»ga xo‘jayinlik qilishi kerak.

Biz eski tizimga moyillik qilamiz, «Rayono» nima desa shuni qilamiz. Zamon o‘zgarmoqda, kechirasizu, qishloq xo‘jaligida paxtaga tizim o‘zgartirdik. Endi paxta ham, tizim ham ishlamoqda.

Qachon qishloq xo‘jaligida ikki millard dollarlik eksport bo‘lar edi? Endi mana tekstil ishlamoqda, boshqa ishlab chiqarish bor»

, — dedi Prezident.

Mavzuga doir:
Xalq ta’limi vazirining Prezident murojaatnomasiga munosabati

2023 yilda xalq ta’limi tizimida qanday o‘zgarishlar bo‘ladi?

Xalq ta’limi tizimida qanday kamchiliklar bor?