Farzandlarni uyda dars tayyorlashga o’rgatishning sirli formulasi

Ibratli ota-ona
Bizni telegram orqali ham kuzatishingiz mumkin Kanalga obuna bo'lish

Karantin kunlarida ota-onalar va farzandlar o’rtasidagi munosabat yanada yaqinlashadi.

 O’qituvchilar o’quvchilarning bajarayotgan vazifalarini masofadan turib onlayn tarzida baholamoqdalar. Hozirda o’quvchilarning vazifalarni bajarishlari va fanlarni o’zlashtirishlari ko’prok ota-onalarga bog’liq bo’lib qolmoqda. Ular  o’qituvchilik vazifasini o’z zimmalariga olib, farzandlarining darslarini muntazam nazorat qilish barobarida darslarini o’z vaqtida o’zlashtirishiga astoyidil harakat qilmoqdalar. Ular o’qituvchilik ma’suliyatini oson emasligini yanada anglab yetayotgani hech kimga sir emas. Bu borada Nizomiy nomidagi Toshkent davlat pedagogika universiteti Pedagogika va psixologiya fakulteti o’qituvchisi G. Baykunusovaning tavsiyalarini e’tiboringizga havola etamiz.

 

Uyga vazifaning muhimligining besh sababi:

– Maktabda olgan bilim va ko’nikmalarni mustahkamlaydi

– O’quvchida yanada ma’suliyatni oshiradi.

– Xotirani tiklaydi va diqqatning to’plashga yordam beradi.

– O’z-o’zini nazorat qilish va mustaqil fikrlashga ega bo’ladi.

– O’ziga bo’lgan ishonch hissini oshiradi.

 

Ota-onalar o’g’il-qizlari uchun dars tayyorlashida faollik ko’rsatsagina, ularda o’qishiga nisbatan faollik ortadi. Sababi, ularning muhim ish bilan shug’ulanayotganlik hissini beradi. Ota-onalar farzandlariga dars tayyorlashiga ko’maklashishi degani, soatlab birga dars qilish kerak degani emas. Aksincha, darslarni tashkil etish bilan bog’liq ko’nikmalarni o’rgatish, qiyin vaziyatlarda ularga tushuntirish va yutuqlarga erishishida yordamlashish.

 

Tavsiyalar:

  1. Farzandingizning ustozi bilan doimo aloqada bo’ling. Sinf majlislarida faol qatnashing. Doimo uyga berilgan vazifalarini nazorat qilib turing.
  2. Uyda dars tayyorlashga sharoit yarating. yorug’likning kerakli miqdorda tushishiga e’tiborli bo’ling. E’tiborni jalb etmaydigan dars stoli bo’lsin.
  3. Dars tayyorlashning doimiy vaqtini belgilang. Darslarni tayyorlash vaqtini bolaning xohishiga qarang va zerikib qolmasligi uchun orada qiziqarli mashg’ulotlar bajarishiga imkoniyat bering. Xolerik tipdagi bolalarga ayniqsa, turli o’yinlardan so’ng dars qildirish ma’qul ko’rinadi. Flegmatik tipdagilar esa ko’p vaqtini shoshilmasdan dars qilishni xohlashadi. Melanxolik tipdagi bolalarga tez-tez charchab qolishini hisobga olib, ularga sokin dam olish muhitini yaratish zarur hisoblanadi. Darslarni bajarishida bolalarning xarakter jihatlari ham muhim o’rin tutishini unutmang.
  4. Farzandlaringiz o’zi bajaradigan ishlari uchun reja tuzib olshiga o’rgating. Bu ulardagi ma’suliyatni yana ham oshirishga yordam beradi.
  5. Farzandingiz dars tayyorlashida e’tiborini tortadigan baland musiqa va televizor ovozini aslo balandlatmang. Dars tayyorlashida bolaga salbiy ta’sir etadi va fikrni chalg’itadi.
  6. Siz farzandingizga namuna bo’ling. Ular ayniqsa ota-onalariga taqlid qilishni yaxshi ko’radi. Ular uchun siz “ko’zgu” ekanligingizni unutmang! Biz kitob o’qisak, “Darsingni qil!” deyishimizga umuman hojat qolmaydi, albatta!
  7. Farzandingiz bajargan ishlarini va tirishqoqligini o’z vaqtida maqtang va rag’batlantiring. Rag’bat o’ziga bo’lgan ishonch hissini yanada  oshirishga yordam beradi.
  8. “Sobiq-o’quvchi” sindromidan voz keching. Ko’pincha ota-onalarga farzandining olgan bahosi muhim hisoblanadi. Bu aslida xato fikr. Muhimi uning bahosi emas, balki olgan bilimi ekanligidadir. Bunday fikrlashga bolalik xotirasi va hadiksirash hissi undaydi. YA’ni, bajarilmagan uy vazifasi uchun uyat hissi farzandimizda hammasi “ideal” bo’lish kerak degan tuyg’uga olib keladi. Lekin, bunda biz o’z o’tmishimiz bilan farzandimiz kelajagini alishtirib qo’yamiz. Aslida bolaning o’qishidagi xatosi, bu uning shaxsiy xatosi va tajribasi ekanligini anglab yeting!
  9. Farzandingiz uchun ham motivator ham monitor bo’ling. Monitor bo’lish u bilan doim qiziqib, uni doim nazorat qilishni anglatadi.

 

Qanday qilib bolada motivatsiyani oshirish mumkin?

Farzand doim ota-onasidan o’rnak oladi. Sizning ota-ona sifatidagi vazifangiz uni hayotda eng zo’r bo’lishga undashdan iborat. Keling, bu borada ham psixologni ba’zi maslahatlariga quloq tutamiz.

  1. Bolaga kichik va katta maqsadlarni o’z oldiga qo’yishni o’rgating. Ota-ona sifatida Siz bu maqsadlar haqiqatda mehnat natijasida erishishini tushuntiring.
  2. Farzandingiz muvaffaqiyatini birgalikda nishonlang va doim mehnatini qadrlang va maqtang.
  3. Farzandingizni kelajakda bajarmoqchi bo’lgan ishiga ishonch hissini orttiring. SHubha va hadiklardan voz keching.
  4. Farzandingiz qiziqishlari haqida ko’proq biling. Bu Sizni g’amxo’rlik qilayotganingizni ko’rsatadi.
  5. Farzandingiz uchun doim Siz ijobiy va to’g’ri yo’l ko’rsatuvchi bo’lib qoling. Farzandingiz sizda qo’rqinch va shubhani ko’rmasin, shunda o’ziga nisbatan ishonchi ortadi.

 

Aytishlaricha, uy vazifasini bajarish bilan bog’liq ota-onaning talabi va bolaning mas’uliyati o’rtasidagi nomutanosiblik doimo saqlanib qoladi. Siz uchun bergan maslahatlarimiz Siz aziz ota-onalar va bolalaringiz o’rtasida bunday nomutanosiblikni kamayishiga yordam beradi deb o’ylamiz. Doimo o’g’il – qizlarning bilim olishida ota-onalarning hissalari va ma’sulyatlari katta ekanligini hech ututmasligimiz kerak. Hozirgi davrda ularning masofadan turib ta’lim olishida vazifalarimiz ko’p va muhim ekanligini unutmaylik.

Maqola yoqdimi! Uni tezroq do'stlaringizga ma'lum qiling:
BAXTIYOR.UZ
Izoh qo'shing

;-) :| :x :twisted: :smile: :shock: :sad: :roll: :razz: :oops: :o :mrgreen: :lol: :idea: :grin: :evil: :cry: :cool: :arrow: :???: :?: :!: