O‘qituvchilarga haftalik onlayn malaka sertifikati olib berayotganlarga chora ko‘rilishi aytildi

«A.Avloniy platformasidan ro‘yxatdan o‘tib, malaka sertifikati olib beramiz, narxlarini kelishamiz»…

Ijtimoiy tarmoqlardagi tarqalayotgan yuqoridagi achinarli «savdolashish»ga institut tomonidan rasmiy munosabat bildirildi.

Afsuski, «guruch kurmaksiz» bo‘lmaganidek, so‘nggi vaqtlada pedagog ustoz, degan ulug‘ nomni bulg‘ayotganlar ham yo‘q emasligiga guvoh bo‘lmoqdamiz.

Haqiqiy va haqqoniy o‘qituvchi bo‘lishni o‘z oldiga maqsad qilgan minglab ustozlarimizdan uzr so‘ragan holda, shuni ma’lum qilamizki, o‘qituvchi o‘z ustida ishlashi uchun uch xil shaklda, ya’ni, onlayn, oflayn, mustaqil ta’lim olishini tashkil qilgan A.Avloniy nomidagi milliy-tadqiqot institutining mehnatini obro‘sizlantirayotgan bunday xabarlar fonida har qanday sharoitda ham o‘z ustida ishlashni, zamonaviy pedagogikani o‘rganishni emas, osonlikcha moddiy mablag‘ topishni ko‘zlayotgan, boshqacha qilib aytganda xalqiga xiyonat qilayotgan ayrim kimsalar borligi achinarli.

Korrupsion tizimni parchalash dasturlari asosida tubdan yangilangan malaka oshirish tizimida malaka ishi va imtihon tizimi yo‘q qilinib, qulay va qo‘rqinchli talablarsiz (o‘zlashtirmaguncha cheksiz qayta imtihon topshirish imkoniyati mavjud bo‘lgan) tizim yaratildi.

Bundan ma’lumki, barchasi faqat vijdon, saviya, dunyoqarash va shaxsiy tanlovga qoldirilgan.

Jamiyatda ta’lim olish madaniyati bo‘lmasa, biz uni shakllantirish uchun bor kuchimizni sarflayapmiz. Ammo, ora-sirada hali ham o‘zini «eski tizimda malaka oshirayapman», deb his qilayotganlar borligi ta’lim islohotlariga avvalo, har bir pedagog shaxsan tayyor bo‘lishi kerakligini ko‘rsatmoqda.

“Uzluksiz ta’lim” platformasida mobil, noutbuk orqali ro‘yxatdan o‘tgan, malaka oshirayotgan o‘qituvchilarning IP manzili, ism-sharifi, ish joyi ma’lum bo‘lib, foydalanuvchi necha marotaba urinish qilgani, bir kunda saytda o‘tirgan soat va vaqtlari, bir qurilmadan nechta odam nomidan platformaga kirilganligi haqida institut tomonidan ma’lumot to‘plangan.

Platforma ishga tushgach, qing‘ir yo‘llar qidirayotganlar necha foizni tashkil qilayotgani ilmiy tomondan ham o‘rganilgan va unga qarshi tezkor dasturlar ishlab chiqilgan. Mavzular va kurslar oralig‘idagi uzilish soatlari platformani ayrim shovvozlar tomonidan “bozor” qilinishiga yo‘l qo‘ymaydi.

Yuqoridagi holatlar mutlaqo noqonuniy xatti-harakat bo‘lib, hozirda holat yuzasidan surishtiruv ishlari olib borilmoqda. Tez orada monitoring ishlari boshlanadi. Uning natijasida “sohta o‘qigan ustozlar”ga keskin choralar ko‘rilishi haqida ma’lum qilamiz.

Hurmatli pedagoglarimizdan turli firibgar kanallar reklamasiga uchmaslikni va boshqa fidoyi o‘qituvchilar obro‘sini to‘kmasligingizni iltimos qilamiz.

Maqsadimiz sohaga malakali mutaxassislarni tayyorlash va maktab ta’limi sifatini haqiqatdan ham ko‘tarishdir.

Agarda, platforma bilan bog‘liq savollaringiz bo‘lsa, 24/7 formatida ishlaydigan rasmiy telegram guruhimizga a’zo bo‘lib, bizga murojaatingizni yuboring👉https://t.me/+dcbeoS6DQvhmOTU6

A.Avloniy nomidagi milliy-tadqiqot instituti mamlakat ta’limini yaxshilash maqsadida barcha harakat va imkoniyatlarini ishga solishga tayyor.

Mavzuga doir:
Maktab oʻqituvchilari onlayn malaka oshirishi mumkin

Muqobil malaka oshirish shakllari ro‘yxati

Sertifikat haqida hazil maqollar (o‘qituvchilar uchun)