Qo’shni davlatlardan o’qishni ko’chirish bo’yicha qo’shimcha ma’lumotlar

Davlat qabul komissiyasining 2020 yil 28 fevraldagi 13-son bayoniga muvofiq quyidagilar belgilandi:

1⃣ qo’shni davlatlardagi OTMlardan respublika OTMlariga o’qishi ko’chirilishi ruxsat berilgan talabalar soni taqsimoti OTMlar kesimida tasdiqlandi;

2⃣ qo’shni davlatlarning OTMlarida kamida bir semestr mobaynida o’qishini davom ettirmasdan, boshqa davlatlarning (xususan, Rossiya Federasiyasi va boshqa davlatlar) OTMlaridan o’qishini o’quv yilining yarmida ko’chirib o’tgan talabalarning o’qishi ko’chirilmaydi;

Bu nima degani?

Qo’shni davlatlardan o’qishni imtihonsiz ko’chirish mumkinligi haqida xabar chiqqach, Rossiya yoki Ukrainada o’qiyotgan talabalar uddaburonlik bilan o’z o’qishini qo’shni davlatga (asosan Qozog’iston) ko’chirib o’tishgan edi. Ammo ular Qozog’istonda hatto 1 semestr ham o’qishgani yo’q. Ana shunday talabalar o’qishini O’zbekistonga ko’chira olishmaydi.

3⃣ qo’shni davlatlarning OTMlarida masofaviy ta’lim shakli bo’yicha va onlayn tarzda tahsil olayotgan talabalarning o’qishini ko’chirishga ruxsat berilmaydi;

4⃣ qo’shni davlatlardagi OTMlardan respublika OTMlariga o’qishini ko’chirish faqatgina joriy yilda Davlat qabul komissiyasi tomonidan belgilangan muddatlarda amalga oshirilishi qat’iyan belgilab qo’yildi.

Bu nima degani?

Ko’pchilik joriy yildagi kabi o’ziga xos “amnistiya” har yili bo’ladi, deb o’ylashmoqda va shu sababli yozda qo’shni davlatlarga oldingidan 10 barobar ko’p yoshlar o’qishga ketishni reja qilib turishibdi. Uyoqqa imtihtonsiz o’qishga kiramiz, keyin qishda o’qishini imtihonsiz ko’chiramiz, deb o’ylashayotgandi. O’shanchun ham qarorda aniq belgilandiki, bunday aksiya faqat joriy yilda bo’ladi, keyingi yillarda umumiy tartibda imtihon asosida o’qishni ko’chirish mumkin bo’ladi.

5⃣ qo’shni davlatlardagi OTMlardan o’qishni ko’chirish natijalari uch kun muddatda tegishli OTMlarga yetkaziladi. Olingan ma’lumotlarga ko’ra, jami 36 ming 400 nafardan ko’proq talabalarga o’qishini 80 ta OTMga ko’chirishga ruxsat berildi.