O’zbek tilini o’rgatish takomillashtirilmoqda

O’zbek tilini o’rgatish takomillashtirilmoqda

Bugungi fan-texnika, texnologiya va boshqa sohalardagi ulkan taraqqiyot ayni hayot tarzimizni mutlaqo o’zgartirib yubordi.

Bugun ko’p hayotiy voqeliklarga, muammo va kamchiliklarga kechagi andozalar bilan yondashib bo’lmaydi, chunki har bir zamonning o’z shiddati, maromi, konseptual yondashuv tizimi bo’ladi.
Bugun mamlakatimizda hamma sohalar qatori ta’lim tizimi ham jadal sur’atlar bilan rivojlanib bormoqda. Bu borada Prezidentimiz va Hukumat tomonidan qator qonunlar, farmon va qarorlar, me’yoriy hujjatlar ishlab chiqilib, amaliyotga joriy etilmoqda.
Yoshlar ta’lim-tarbiyasi, ularni milliy tilimiz va adabiyotimizga qiziqtirish, ular qalbida milliy qadriyatlarimizga hurmat ruhini shakllantirish, mamlakatimiz tarixi va tilimizni chuqur o’rganishlari, uning betakrorligi, go’zalligini his qilishlari uchun alohida izlanishlar olib borishni zamonning o’zi taqozo qilib turibdi.
Ayniqsa, Ona tili darslarini shablon metodlar asosida emas, yangicha, innovatsion usullarda tashkil etish shu soha mutaxassislari va ta’lim tizimi mutasaddilari oldidagi birlamchi vazifalardan hisoblanadi. Bu borada xalq ta’limi vazirligida kelgusida bir qator yangiliklar joriy etilishi rejalashtirilgan.
Xususan, kelajakda o’quv dasturini soddalashtirish, o’quvchilarni zerikarli ma’ruzalar, murakkab grammatik qoidalarni quruq yodlatish bilan cheklanmay, ularning so’z boyligini oshirish maqsadida, darsliklardagi grammatik qoidalarni 90 foizdan 50 foizga tushirish mo’ljallangan. Bu jarayonda tilshunoslikning fonetika, leksikologiya, morfologiya va sintaksis bo’limlariga oid ayrim mavzularni bakalavr bosqichiga ko’chirish ko’zda tutilmoqda. Chunki o’quvchiga grammatik yuklamalar, nazariy qoidalarning haddan ziyod ko’p berilishi, ularni ortiqcha darajada murakkabligi o’quvchilarni fanni chuqur o’zlashtirishlariga to’siq bo’libgina qolmasdan, qaysidir ma’noda darsdan ko’ngli sovushiga sabab bo’lmoqda. Buni ko’p yillik amaliy tajribalar va o’quvchilarimizning fanga munosabati ochiq-oydin ko’rsatib turibdi.
O’zbek tili ta’limini takomillashtirish pirovardida o’quvchi matnni o’qish, o’qiganini tushunish va tushunganini yoza olish salohiyatiga ega bo’ladi. Ona tili darslari o’qitilishining asosiy vazifasi, ustuvor mohiyati ham shunda ko’rinadi.
Mazkur jarayonda o’quv darsliklari bilan birga “O’quvchi mashq daftari” va “O’qituvchi kitobi” yaratilib, ularning amaliyoti parallel ravishda olib boriladi.
Qolaversa, Ona tili ta’limida xorijiy mamlakatlar tajribalari asosida raqamli diktantlar, audio va video materiallar, mantiqiy va fanlararo integratsiyani o’zida mujassam etgan matnlar beriladi, mashg’ulotlar so’ngida o’quvchilarning so’z boyligi, savodxonligini oshirish maqsadida PISA va PIRLS topshiriqlari kiritiladi.
Umida Muslimova
Xalq ta’limi vazirining ma’naviy-ma’rifiy ishlar samaradorligini
oshirish, davlat tili to’g’risidagi qonun hujjatlariga rioya etilishini
ta’minlash masalalari bo’yicha maslahatchisi

Manba: Uzedu.uz

Maqola yoqdimi! Uni tezroq do'stlaringizga ma'lum qiling:
BAXTIYOR.UZ
Fikr bildirish

;-) :| :x :twisted: :smile: :shock: :sad: :roll: :razz: :oops: :o :mrgreen: :lol: :idea: :grin: :evil: :cry: :cool: :arrow: :???: :?: :!: