Maktablar reytingi bo’yicha barcha savollarga javoblar

Maktablar reytingi bo’yicha barcha savollarga javoblar
Bizni endi Telegramda ham o'qishingiz mumkin. Kanalga obuna bo'lish

Maktablar reytingi nima va qanday tashkil etiladi? Barchasiga oydinlik kiritamiz.

Mazkur savol-javoblar O’zbekiston Respublikasi Vazirlar Mahkamasi huzuridagi ta’lim sifatini nazorat qilish davlat inspeksiyasi ma’lumotlari asosida tayyorlandi.
Istalgan savolga bosganingizda javobi paydo bo’ladi.

Maktablar reytingining maqsad va vazifalari nima?

Umumta’lim muassasalari faoliyati samaradorligini baholash orqali Respublikamiz umumiy o’rta ta’lim tizimida sog’lom raqobat muhitini paydo qilishga qaratilgan. Reyting orqali umumiy o’rta ta’lim muassalari faoliyati samaradorligiga baho beriladi, ta’lim sifatini monitoring va nazorat qilish ta’minlanadi.

Maktablar reytingi bizga nima beradi?

Reyting baholash tizimi ta’lim muassasalarida ta’lim sifatini xalqaro andozalarga yaqinlashtirishga xizmat qiladi. Maktablar faoliyati samaradorligini reyting baholash tizimini joriy qilishdan asosiy maqsad PISA, TIMSS va PIRLS xalqaro o’quvchilar bilimini baholash dasturlari darajasiga olib chiqishda ta’lim muassasalariga ko’maklashishdir.Umumta’lim muassasalari faoliyati samaradorligini reyting baholash, kelgusida xalqaro maydonda, O’zbekiston Respublikasining PISA-2021 xalqaro baholash dasturiga tayyorgarlik jarayoniga ham xizmat qiladi.

Maktablar reytingi ta’lim sifatiga qanday ta’sir ko’rsatadi?

Mamlakatimizda faoliyat yuritayotgan umumta’lim maktablari faoliyatini milliy reyting baholash tizimi orqali monitoring qilib borish o’z-o’zidan maktablarda ta’lim sifatini oshirilishiga, o’quvchilarning sifatli bilim olishiga, o’qituvchilarning sifatli ta’lim berishiga, o’quvchilardan olinayotgan ananim so’rovnomalar orqali o’qituvchilarning bilimiga baho berish imkoniyati yaratiladi.

Maktablar reytingi aniqlanayotgan davrda ota-onalardan so’rovnomalar olish ko’zda tutilganmi?

Har yili milliy reyting baholash tizimiga jalb qilingan umumta’lim maktablarida o’quvchilarning ota-onalaridan maktab faoliyatini baholash, rivojlantirish, o’qituvchilarning bilim saviyasini aniqlash va oshirish hamda o’quvchilar bilim olishi uchun yaratilgan sharoitlarni aniqlash maqsadida kelgusi yildan boshlab ijtimiy so’rovnomalar o’tkazish ko’zda tutilgan.

Reyting bo’yicha xorij tajribasi nimani ko’rsatadi?

Umumta’lim maktablarining reyting baholash tizimida xorij tajribasi haqida fikr yuritadigan bo’lsak, maktablar faoliyatini rivojlantirish uchun xorijiy investisiyalarni jalb qilinishi, o’quvchilarning respublika va xalqaro fan olimpiadalari hamda nufuzli tanlovlarda ishtirok etish salmog’ini oshirish, shuningdek mamlakatmiz umumta’lim maktablarining jahonda o’z o’rniga ega bo’lishiga va mavqeini oshirishga zamin yaratadi. Jahon tajribasi shuni ko’rsatadiki, umumta’lim maktablarining reyting baholash tizimida yuqori o’rinni egallashi uchun o’quvchilarning bilimi va o’qituvchilarning erishgan yutuqlari asosiy o’rinni egallaydi. Bizda umumta’lim maktablari o’qituvchilari ko’p vaqtlarini tashkiliy ishlarga sarflayotganliklari bois o’quvchilar bilan shug’ullanishga deyarli vaqt topa olishmayabdi. Xorij tajribasiga nazar tashlaydigan bo’lsak, umumta’lim maktablari o’qituvchilari asosan o’quvchilarga bilim berish bilan shug’ullanib, ularni xalqaro fan olimpiadalari va ko’rik tanlovlarga olib chiqish, maqolalar yozish, darsliklar, o’quv qo’llanmalar, monografiyalar nashr qilish bilan shug’ullanadilar.

O’zbekistonda reyting masalasi qanday yo’lga qo’yilgan?

O’zbekiston Respublikasida umumta’lim maktablarining reyting baholash tizimi 2018 yil 5 sentyabrdagi “Xalq ta’limini boshqarish tizimini takomillashtirish bo’yicha qo’shimcha chora-tadbirlar to’g’risida”gi PF-5538-son Prezident Farmoni asosida yo’lga qo’yilgan.

Birinchi bor maktab reytingi tajriba-sinov tariqasida tashkil etilgan milliy reyting tizimi qanday ishlab chiqilgan?

Mamlakatimizda faoliyat yuritayotgan umumta’lim maktablari uchun joriy yilda birinchi marta tajriba-sinov tariqasida milliy reyting tizimi ishlab chiqildi. Ushbu reyting 2018 yil 5 sentyabrdagi “Xalq ta’limini boshqarish tizimini takomillashtirish bo’yicha qo’shimcha chora-tadbirlar to’g’risida”gi PF-5538 son Prezident Farmoni ijrosini ta’minlash, shuningdek ilg’or xorij tajribasini o’rganish, sohada faoliyat yuritayotgan mutasaddi xodimlar va ekspertlarning fikr-mulohazalari asosida milliy reyting baholash tizimi indikatorlari ishlab chiqildi

Qaysi davlatlar tajribasi tahlil qilingan?

Umumta’lim maktablari reyting baholash tizimini ishlab chiqishda rivojlangan davlatlardan Rossiya Federatsiyasi, Ukraina, AQSH, YAponiya va Janubiy Koreya kabi davlatlarining tajribasi o’rganilib, reyting indikatorlari tahlil qilinib amaliyotga joriy qilindi.

Reyting ma’lumotlarini yig’ish mexanizmi qanday?

Umumta’lim maktablari reyting baholash tizimiga jalb qilingan maktablarning 9-sinf o’quvchilaridan diktant va matematikadan yozma ish o’tkaziladi. Reytingning boshqa indikatorlariga tegishli bo’lgan ko’rsatkichlar Ta’lim sifatini nazorat qilish davlat inspeksiyasi hodimlari va inspeksiyaning hududiy bo’lim hodimlari orqali yig’iladi va Davlat inspeksiyasiga taqdim etiladi.

Ma’lumotlar qanday va kimlardan olinadi?

Umumta’lim maktablarining reyting baholash tizimiga oid bo’lgan ma’lumotlar haqida gapiradigan bo’lsak, bitiruvchilarning umumta’lim fanlari bo’yicha tayyorgarligi va ta’lim sifati darajasi ko’rsatkichi, umumta’lim muassasasi 9-sinf o’quvchilarining bilim darajasi ko’rsatkichi, umumta’lim muassasasining oliy va birinchi toifali pedagog hodimlari ulushi, umumta’lim muassasasining o’quvchilari va pedagog jamoasi o’rtasida o’tkazilgan so’rovnoma natijalari haqidagi ma’lumotlardan iborat va ushbu ma’lumotlar maktab jamoasidan olinadi.

Milliy reytingni baholash metodikasi nimalardan iborat?

Umumta’lim maktablarida milliy reyting baholash tizmi metodikasi quyidagilardan iborat: bitiruvchilarning umumta’lim fanlari bo’yicha tayyorgarligi va ta’lim sifati darajasi ko’rsatkichi, umumta’lim muassasasi 9-sinf o’quvchilari bilim darajasi ko’rsatkichi, umumta’lim muassasasining oliy va birinchi toifali pedagog hodimlari ulushi ko’rsatkichi, umumta’lim muasasasining o’quvchilari va pedagogik jamoasi o’rtasida o’tkazilgan so’rovnoma natijalari kabi ko’rsatkichlaridan iborat.

Mamlakatimizdagi hususiy maktablar reytingga nega qo’shilmagan?

Mamlakatimizda xususiy maktablarni rivojlantirish to’liq yo’lga qo’yilmaganligi, xususiy maktablar salmog’ining kamligi hamda mavjud xususiy maktablarda 9-sinf o’quvchilarning barchasida ham mavjud bo’lmaganligi bois milliy reyting baholash tizimiga jalb qilinmagan.

Kelajakda ularni ham baholash ko’zda tutilganmi?

Mamlakatmizda xususiy maktablar ochishni yo’lga qo’yish va litsenziya berish, xususiy makatblar faoliyatini muntazam ravishda monitoring qilib borish Davlat inspeksiyasi tomonidan amalga oshiriladi. Kelajakda xususiy maktablar salmog’ining ortishi, respublikamizda ta’lim xizmatlari ko’rsatilishini rivojlantirish va ta’lim sohasida sog’lom raqobat muhitini yaratish uchun kelgusida reyting baholash tizimiga xususiy maktablar jalb qilinadi.

Reyting bo’yicha natijalar qaerda va qanday ko’rinishda e’lon qilinadi?

O’zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi tomonidan umumta’lim muassasalari faoliyati samaradorligi bo’yicha reyting natijalari ommaviy axborot vositalarida va Davlat inspeksiyasining veb-saytida keying o’quv yili boshlanishidan kechiktirilmay e’lon qilinadi.

Qaysi xalqaro tashkilotlar bilan hamkorlik qilingan?

Umumta’lim maktablari reyting baholash tizimini ishlab chiqishda jahon banki, PISA, TIMSS va PIRLS kabi xalqaro agentliklar hamda tashkilotlar bilan hamkorlik yo’lga qo’yilib, Davlat inspeksiyasida qator uchrashuvlar o’tkazilgan.

Reyting nima uchun faqat 10% maktablardan olindi?

Joriy yilda mamlakatimizda umumta’lim maktablarini reyting tizimi orqali baholash birinchi marta yo’lga qo’yildi. Mamlakatmizda faoliyat yuritayotgan maktablar soni 10 mingdan ortiqligi va ularni to’liq qamrab olish imkoniyati mavjud bo’lmaganligi hamda bu yilgi maktablar tajriba-sinov tariqasida o’tkazilganligi sababli Xalq ta’limi vazirligi bilan kelishgan holda va hududlarni o’zlari tanlovi asosida 10 foiz maktablar reyting baholash tizimiga jalb qilindi.

Nima maqsadda o’qituvchilar toifalari reytingga kiritildi?

Mamlakatimizda pedagog-kadrlar tayyorlash tizimini takomillashtirish va respublikamiz xalq ta’limi tizimida ilmiy salohiyatni oshirish, umumta’lim maktablarida toifali o’qituvchilar salmog’ini oshirish maqsadida reyting baholash tizimiga faqat toifali o’qituvchilar kiritilgan.

Reytingga tanlangan toifalar faqatgina oliy va birinchi toifalar bo’ldi, nima uchun 2-toifa hisoblanmadi?

Umumta’lim maktablarida oliy va birinchi toifa sertefikatlarini olish ancha vaqt va mehnat talab qiladi. Oliy va birinchi toifa sertefikatini olish uchun o’qituvchilar Davlat inspeksiyasi tomonidan o’tkazildigan test sinovlaridan o’tishlari kerak bo’ladi. Ikkinchi toifa haqida gapiradigan bo’lsak, o’qituvchilarning ish staji va suhbat natijalari asosida o’tkazilib, unchalik bilim talab qilinmaydi. SHuning uchun umumta’lim maktablarida o’qituvchilar salohiyatini oshirish va sifatli bilim berish tizimini takomillashtirish uchun ikkinchi toifa inobatga olinmagan.

Nima uchun faqat 9-sinf o’quvchilari reytinga tanlandi?

Umumta’lim maktablarini reyting baholash tizimida o’quvchilarning bilimiga alohida urg’u beriladi. Hozirgi kunda mamlakatimizda faoliyat yuritayotgan umumta’lim maktablarining 9-sinf o’quvchilari reyting baholash tizimiga jalb qilingan.

Reytingni baholashda qaysi fanlar tanlangan?

Reyting baholash tizimi uchun ikkita fandan nazorat ishlari o’tkaziladi, ya’ni ona tilidan diktant va matematikadan yozma ish.

Nima sababdan reytingni aniqlashda matematikadan yozma ish olindi test emas ?

Umumta’lim maktablari reyting baholash tizimida matematikadan yozma ish olindi. Buning sababi O’zbekiston Respublikasi maktab o’quvchilari 2021 yilda PISA-2021 xalqaro baholash dasturida qatnashadi. PISA xalqaro baholash dasturida asosan o’quvchilardan test emas balki yozma ish olinadi. PISA-2021 xalqaro baholash dasturiga munosib ravishda tayyorgarlik ko’rish, xalqaro tajribadan kelib chiqan holda va Vatanimiz mavqeini xalqaro maydonlarda bundanda ko’tarish maqsadida matematika fanidan test emas yozma ish o’tkazildi.

Reytingda 9-sinf o’quvchilaridan ona tilidan diktant olinishidan maqsad nima ?<br /> Nima uchun insho yoki bayon emas ?

Umumta’lim maktablari reyting baholash tizimida ona tilidan diktant olindi. Buning asosiy maqsadi o’quvchilarda yozish ko’nikmasini oshirish, o’quvchilarning husnixat va eshitish qobiliyatlarini shakllantirilishida asosiy mezon bo’lib xizmat qiladi.

O’qituvchilardan ijtimoiy so’rovnoma o’tkazishdan maqsad nima?

O’qituvchilardan ijtimoiy so’rovnoma o’tkazishning asosiy maqsadi o’qituvchilar uchun umumta’lim maktablarida yaratilgan sharoitlar, maktab direktorlarining boshqaruv qobiliyatini baholash va so’rovnoma natijalari asosida o’qituvchilar faoliyatiga to’sqinlik qilayotgan ayrim muammolarga barham berib yordam berishdan iborat.

O’quvchilardan ijtimoiy so’rovnoma o’tkazishdan maqsad nima ?

Reyting baholash tizimiga jalb qilingan umumta’lim maktablari o’quvchilaridan anonim so’rovnoma o’tkazildi. Buning asosiy maqsadi o’qituvchilarning o’quvchilarga bilim berish darajasini aniqlash, o’quvchilarning o’qituvchilar faoliyati haqidagi fikrlarini o’rganish, o’quvchilarga ta’lim olish uchun yaratilgan sharoitlarni tahlil qilish va o’quvchilarning sifatli bilim olishlari uchun to’sqinlik qilayotgan muammolarni o’rganib bartaraf qilishdan iborat.

Bitiruvchi 11-sinf o’quvchilarining oliy ta’lim muassasalariga kirish ulushi ta’lim sifatiga qanday ta’sir o’tkazadi?

Reyting baholash tizimiga jalb qilingan umumta’lim maktablari bitiruvchilarning oliy ta’lim muassasalariga kirish ulushi muhim ko’rsatkichlardan biri hisoblanadi. Bu ko’rsatkichni hisoblashdan asosiy maqsad bitiruvchi o’quvchilari maktabni tamomlab oliy o’quv yurtlariga hujjat topshirgan va talaba bo’lish bahtiga muyassar bo’lgan o’quvchilar soni qaysi maktabda ko’p ekanligini aniqlashdan iborat. Reytingda yuqori o’rinni egallash uchun qolgan maktablar o’rtasida sog’lom raqobat muhitini yaratish hamda maktab o’quvchilarini oliy ta’lim muassasalariga kirish salmog’ini oshirish maqsadida o’ituvchilarning sifatli ta’lim berishini ta’minlashdan iborat. Bularning barchasi umumta’lim maktablarida ta’lim sifatini oshirilishiga olib keladi.

Maqola yoqdimi! Uni tezroq do'stlaringizga ma'lum qiling:
BAXTIYOR.UZ
Izoh qo'shing

;-) :| :x :twisted: :smile: :shock: :sad: :roll: :razz: :oops: :o :mrgreen: :lol: :idea: :grin: :evil: :cry: :cool: :arrow: :???: :?: :!: